La cortesia que daunejava sus las banquetas de plastic mofle : senglas plaças e cadun a la soa. La mea, l'afectacion d'uei, qu'anava arribar suu pic. Que lecavi tant la mea smartwatch de cobedessa que vadossi roia de vergonha : " ProjecteFun. Volhatz préner la tresau correspondéncia. Quan arríbitz a destinacion, seguitz las placas correspondentas”.

L’excitacion qu'èra tau, que’m velava per un eishugèr perfèit, las nominacions deus autes qui vibravan a tot torn. Qu'èri comolat e que'm vagava d'ac publicar suu men perhiu. "Uei, ProjecteFun ! #lifeisperfect #happy” qu'escrivèvi dab l’expertisa d'un utilizator acostumat. Las notificacions dab caratonas d'òste jaunas qui haravan pòts e los poç blaus que vienón a pos. Qu'èra beròi d'estar atorejat atau. Dens la veitura, lo monde que s'enterflatavan deliciosament.

N'avèva pas nada manièra de's pèrder per totas las vias que comptava la grana gara deu nòrd. Cada usatjant n'avèva pas sonque a seguir las indicacions — qu’èra un miracle organizacionau deu quau profieitèi dab plaser, caminant per las alandadas blancas de las quaus e'ns podèvam estimar lo perfum microbicida de la lavanda de sintèsi ; qu'arremerciavi los inventaires d'un tau prodigi shens ne poder mentàver nat. Qui se'n dava ? Qu'anava viste, a bua d’arrais e qu'estoi tant lèu a la buta que ne vedoi pas sonque, suu passatge, pòcas aficas preventivas deu Comitat Sanitari, sus las quaus e podèvam véder un vielh malandrós qui's prenèva lo cap de las soas mans crispadas. Ua frasa que'u semblèva sostiéner; aparat atau, com per un espèr de remission, qu'espauriva mensh.

"Non desbrombis pas lo vaccin contra lo tristèr "

Bèth temps a qu’èran pegats aquestes placards. Arrés ne podèva pas díser exact quaus èran los purmèrs signes e quin aqueste aram e s'espandiva abans. Per l'exemple de la pèsta, ne'n demorava pas sonque un nom senspesuc d'un sofriment passat, antic. Qu'èran mentavuts dens las linhas d’e-readers d'Istòria retros. Tot aquò e consentiva a ua fèbre arqueologica de las passionantas e conhida de tròbas, totun, que copèi aquesta hami vadenta, pr’amor de l'excitacion qu'avèvi peu projecte d'uei, lo ProjecteFun, que n’atenuava los simptòmas. Que deishavi la trotineta electrica au bèth miei de las soas congenèras : que semblavan esperar utilizators dab ua purmèra paciéncia.