— Que'ns demandatz de tornar préner la vòsta calme Smiley36. Ne hatz pas un usatge convencionau de l'Urbanride 80X. La guardapatz n'avè pas trigada.

Que cau díser que ne podè pas mancar arren. Tot qu'ac èra filmat per aquesta vila. Completament tot. Los òmis de blanc, casqueta vissadas suu cap que'm puntavan dab los lors tasèrs :

— Posatz la trotineta au sòu e aledatz pregon Smiley36.

Ne'n hasoi pas arren, ne i a pas manièra de seguir adara. Perqué continuavan a m'apèrar atau ? Èri enqüèra la medisha persona ? Que sarravi la mea empresa sus la mea arma, resolvut a non pas voler créder. Que tornavi de cap a d'eths dab un sorríder. N'èra pas lo que la sau de lítium que'vs pegava a la cara la jornada sancèra. Non. Aqueste qu'ac aví causit ; Qu'èra mau e tum ; Que's lor prometèn de la sang. Que m'aborrivi a l'assautada d'aquesta barra blanca per ua corruda dessenada, lo cap davant en arríder, en cridar :

— Be soi Joshua ! Joshua ! Los hius que's mesclavan suu men piet.

Que tremolavi, esmanglat. Que'm gahè ua andada d'aujor, cap e tot. Que m'anavi adromir, qu'ac sentivi. Que monavi dab las darrèras fòrças aqueste nom, lo men, lo que m'aví causit. Lo que s'èra causit. Que'u tornavi enqüèra avant que com un saunei e s'embruma, trebolh puish desapareish. Lo men nom... Que'm clucavi los ueilhs quan lo men còs e bailava enqüèra la tectonica. Puish la calma que vienó. La pelada deu sòu de la gara deu nòrd còsta los mens muscles tetanizats que'm hasó deu ben. Qu'entravi en un doç nonarren, ua doça inconsciéncia :

— Que son 8h deu matin. Adishatz sénher. Tot que va de lis. La votz requista d'Amandà, seleccionada peu demiei d'un trentenat d'enregistraments, que'm tirava tostemps de las meas nueits barbituricas.